khojkhbarchhattisgarh hindi news
Related Articles
खोज खबर छत्तीसगढ़ न्यूज
जनहित के मुद्दा उठाना हमर जिम्मेदारी।
कलम से आयेगी क्रांति।
तिल्दा-नेवरा। नगर पालिका के प्रधानमंत्री आवास योजना के कई हितग्राही किस्त के रकम नई मिलय के कारन भारी परेशानी मं हें। मकान बनाय बर हितग्राही मन करजा लेके काम चालू कर दिस, फेर किस्त के भुगतान समय मं नई आइस, जेन ले अब साहूकार मन घलो तकादा करे बर लगिन।
हितग्राही मन के कहना हे कि महिना बितगे, फेर किस्त के अता-पता नइ हे। किस्त के उम्मीद मं हितग्राही मन बार-बार नगर पालिका के चक्कर काटत हें, फेर सही जानकारी नइ मिलय के कारन वो मन के परेशानी अउ बढ़त जात हे।
हितग्राही मन कहत हें कि प्रधानमंत्री आवास योजना के भरोसा मं घर बनाय के काम चालू करे रहिन। कुछ लोगन अपन जमा पूंजी लगाइस, तो कुछ मन दूसर ले करजा लेके ईंट, पथरा, सिरमिट, लोहा अउ मजदूरी के पैसा पटाइस। अब किस्त नई आय के कारन करजा चुकाय के चिंता घलो सतावत हे।
एक हितग्राही अपन पीरा बतावत कहिस—
“किस्मत आही त देहू ना भईया, कहिके देखत-देखत महिना बितगे। राजा के जनम बछर मनाय डरे, तभो ले हमर मन बर थोरको कहीं कुछ करतिस कथो गा… ईंटा-पथरा-सिरमिट-लोहा के संगे-संग मजदूरी के भाव घलो हड़हत हे, का करबे… शियान बढ़ करलई हे गा।”
हितग्राही मन के कहना हे कि सरकार के योजना के मकसद गरीब परिवार मन ला पक्का मकान के सुविधा देना हे, फेर किस्त मं देरी होय ले योजना के लाभ लेय वाले परिवार मन खुदे करजा के बोझ मं दबत जात हें।
अब सवाल ये उठत हे कि प्रधानमंत्री आवास योजना के पात्र हितग्राही मन के किस्त आखिर कब तक जारी होही? क्या नगर पालिका प्रशासन हितग्राही मन के समस्या ला गंभीरता लेही अउ समय मं भुगतान करवाय बर पहल करही?
हितग्राही मन प्रशासन ले मांग करे हें कि रुके किस्त के भुगतान जल्दी करवाय जावय, ताकि अधूरा मकान पूरा हो सके अउ करजा लेके घर बनावत गरीब परिवार मन ला राहत मिल सके।
